काठमाडौं- लोक गायिका कोपिला गौतमले मंगलबार एक तस्बिर सेयर गरिन्, उनी अस्पतालको बेडमा थिइन्, टाउकोमा एउटा पनि कपाल थिएन ।

उनको अनुहारले नै प्रष्ट पार्थ्यो कि बिमार छिन् । हुन त अनुमान र अड्कलको आवश्यक नै थिएन, उनले लामो क्याप्सनको सुरुवातमै लेखेकी थिइन्, ‘अस्पतालको बेडबाट याचना । १७ औं किमोथेरापी । पैसा सापटी लिएर नतिर्नेहरू सबैका नाममा ।’

गायिका गौतमका अनुसार उनले दुई पटक क्यान्सरलाई पराजित गरिसकेकी हुन् । तेस्रो पटक उनलाई क्यान्सर देखियो । अनि १७ औं किमो चढाइसकेको छ ।

उनलाई अहिले उपचारका लागि पैसा आवश्यक छ । तर, ऋण लगेकाहरूले फिर्ता नलिएपछि उनी सार्वजनिकरुपमा बोल्न बाध्य भएकी हुन् । त्यो पनि क्यान्सर अस्पतालको बेडबाट ।

उनले ऋण फिर्ता नगर्नेलाई संकेत गरेर स्ट्याटस लेख्नुको कारण स्पष्ट खुलाएकी छन्, ‘आज म तेस्रो पटक क्यान्सरसँग लडिरहेकी छु । यो मेरो रहरको लडाइँ होइन, बाँच्नका लागि लडिरहेको युद्ध हो । उपचारका लागि हरेक रुपैयाँको मूल्य मलाई मात्र थाहा छ । सहयोग जुटाएर, ऋण गरेर यहाँसम्म आएँ । आफ्नो पैसा आइहाल्छ नि भनेर लिएको ऋणमा पनि तपाईंका कारण बेइमानी भइरहेका छौं । मैले पाउने मेरो पैसा विलासिताका लागि होइन, मेरो उपचारका लागि हो । म बाँच्नको लागि हो । अझै पनि मेरो जीवनमाथि खेलवाड नगरिदिनुहोस् । कृपया मेरो पैसा फिर्ता गरिदिनुहोस् ।’

आफ्नो रहर र इच्छा नहुँदा पनि जीवन बचाउनका लागि ऋण फिर्ता नगर्नेहरूलाई अस्पतालको बेडबाट सार्वजनिक रुपमा स्मरण गर्नु परेको उनको आशय छ ।

उनले अगाडि लेखेकी छन्, ‘मलाई यसरी सामाजिक सन्जालमा लेख्ने रहर थिएन तर अब पनि चुप बस्दा मेरो एउटै बिकल्प रहयो चुपचाप मृत्यु रोज्नु ।’

अब पनि पैसा फिर्ता नगर्नेको नाम सप्रमाण फेसबुकमा राख्ने उनले चेतावनी दिएकी छन् ।

गायिका गौतमले यस्तो गम्भीर प्रकृति रोगबाट जीवन बचाउन अस्पतालको बेडबाट रकम जुटाउने गरेको संघर्ष आफैँमा दर्नानाक छ । यसले देशको स्वास्थ्य अवस्थाको दयनीय अवस्थाको पनि उजागर गर्छ ।

शरीर शिथिल भएर अस्पतालको बेडमा पुग्दा पनि उपचारका लागि बिरामी आफैँले रकम जुटाउन संघर्ष कहिलेसम्म गर्नुपर्ने हो ? यसले राज्यको नालायकीपन पनि देखाउँछ ।

गायिका गौतमको फेसबुक पोस्टको लिंक : https://www.facebook.com/share/p/1BboGhrwrk