काठमाडौं- नेपाली कांग्रेसका सांसद अभिषेकप्रताप साहलाई पक्राउ नगर्न सर्वोच्च अदालतले अल्पकालीन आदेश जारी गरेको छ ।

न्यायाधीश अब्दुल अजीज मुसलमानको एकल इजलासले शाहविरुद्ध जारी भएको पक्राउ पुर्जी कार्यान्वयन नगर्न बुधबार आदेश जारी गरेको हो ।

सांसद शाहले आफूविरुद्ध जारी भएको पक्राउ पुर्जी बदरको काम गर्दै मंगलबार गृह मन्त्रालय, कपिलवस्तु जिल्ला अदालत र जिल्ला प्रहरी कार्यालय कपिलवस्तुलाई विपक्षी बनाएर रिट निवेदन दिएका थिए।

कपिलवस्तु क्षेत्र नं. ३ बाट निर्वाचित साहविरुद्ध कपिलवस्तुको कृष्णनगरमा कृष्णनगर उद्योग वाणिज्य संघका अध्यक्ष सीताराम शर्मामाथि कुटपिट गरेको आरोप थियो ।

संघीय सांसद साह र कृष्णनगर नगरपालिकाका मेयर (नगरप्रमुख) रजतप्रताप साहसहित १५–२० जनाको समूह शर्माको निवासमा प्रवेश गरेर कुटपिट गरेको भिडियो सार्वजनिक भएको थियो ।

त्यसपछि पीडित शर्माले प्रहरीमा जाहेरी दिएका थिए । त्यही जाहेरीका आधारमा मुद्दा दायर भएपछि सांसद साहमाथि संकट आइलागेको थियो ।