काठमाडौं – अमेरिकी राष्ट्रपति डोनाल्ड ट्रम्पले इरानलाई लेबनानमा सक्रिय रहेको आफ्नो समर्थित संगठन हिजबुल्लाहका गतिविधि रोक्न चेतावनी दिएका छन् ।

ट्रम्पले सामाजिक सञ्जालमार्फत इरानले हिजबुल्लाहलाई नियन्त्रण नगरे अमेरिका थप कडा कारबाही गर्न बाध्य हुने बताएका हुन् । उनले अमेरिकाले यसअघि गरेको आक्रमणभन्दा अझ ठूलो स्तरको कदम चाल्न सक्ने चेतावनी दिएका छन् ।

यसैबीच स्विट्जरल्यान्डको बुर्गेनस्टकमा अमेरिका र इरानबीच उच्चस्तरीय वार्ता सुरु भएको छ । वार्ताका क्रममा अमेरिकी उपराष्ट्रपति जेडी भेन्सले पछिल्ला केही घण्टामा सकारात्मक प्रगति भएको बताएका छन् ।

भेन्सले अमेरिका र इरानले मिलेर क्षेत्रीय शान्ति, स्थिरता र समृद्धिका लागि काम गर्न सक्ने विश्वास व्यक्त गरे । उनका अनुसार राष्ट्रपति ट्रम्पले दुवै देशबीचको सम्बन्धमा नयाँ अध्याय सुरु गर्ने चाहना राखेका छन् ।

उनले आगामी १० वर्षभित्र पश्चिम एसियाको अवस्थालाई परिवर्तन गर्ने लक्ष्य रहेको पनि बताएका छन् । पाकिस्तान र कतारको मध्यस्थतामा भइरहेको उक्त वार्ताको मुख्य उद्देश्य बढ्दो तनाव कम गर्नु र दीर्घकालीन शान्तिको बाटो खोज्नु रहेको बताइएको छ ।

अमेरिका र इरानबीच लामो समयदेखि जारी तनावका बीच सुरु भएको यो वार्तालाई क्षेत्रीय स्थिरताका लागि महत्वपूर्ण पहलका रूपमा हेरिएको छ ।