चितवन– पुर्वप्रधानमन्त्री बाबुराम भट्टराईले राष्ट्रिय स्वतन्त्र पार्टी (रास्वपा) को महाधिवेशनमा सम्बोधन गर्दै आफू ७२ वर्षको भए पनि युवा पुस्ताको ऊर्जा देख्दा २७ वर्षको जस्तो अनुभूति भएको बताएका छन् ।

महाधिवेशनमा बोल्दै उनले भने, ‘म ७२ वर्ष लागेँ, तर यो महाधिवेशन स्थल र मञ्चमा सबै साथीहरूलाई देख्दा म २७ वर्षको छु कि जस्तो लाग्यो।’

आफूलाई निरन्तर विद्रोहीका रूपमा चित्रण गर्दै भट्टराईले नयाँ राजनीतिक शक्तिहरूले नेपाली राजनीतिमा परिवर्तनको सम्भावना बोकेको बताए । उनले रास्वपाले छोटो समयमै हासिल गरेको सफलतालाई नेपाली राजनीतिक रूपान्तरणको महत्वपूर्ण कडीका रूपमा व्याख्या गरे ।

‘राष्ट्रिय स्वतन्त्र पार्टीले चार वर्षभित्रै जनताको मन जितेर, आधुनिक प्रविधि र विज्ञानको प्रयोगमार्फत जनप्रतिनिधि निर्वाचित गराएर उल्लेखनीय उपलब्धि हासिल गरेको छ,’ उनले भने ।

उनले आन्दोलन र संघर्षबाट मात्रै होइन, जनविश्वास जितेर पनि राजनीतिक परिवर्तन सम्भव हुने उदाहरण रास्वपाले प्रस्तुत गरेको उल्लेख गर्दै यसलाई नेपाली क्रान्तिको एक महत्वपूर्ण कडीका रूपमा लिनुपर्ने धारणा राखे ।

भट्टराईले कार्यक्रममा उपस्थित सहभागीहरू बालेन्द्र शाह र रवि लामिछानेको सम्बोधन सुन्न उत्सुक रहेको भन्दै आफ्नो मन्तव्य छोटो राखेका थिए ।