काठमाडौं– कोशी प्रदेशको प्रदेश लोकसेवा आयोगको सदस्यमा मोरङ उर्लाबारीका भीम बहादुर सुब्बा फुदोङ र विराटनगरकी रुपा थापा ओझा नियुक्त भएका छन् । 

प्रदेश लोकसेवा आयोग ऐन २०७६ अनुसार मुख्यमन्त्री, प्रदेश सभामुख र प्रमुख प्रतिपक्षी दलको नेताको सिफारिसमा प्रदेश प्रमुख परशुराम खापुङले दुई जना सदस्यहरू नियुक्त गरेका हुन् । 

विराटनगर स्थित प्रदेश प्रमुखको कार्यालयमा आयोजित एक कार्यक्रमबीच प्रदेश लोकसेवा आयोगका अध्यक्ष महेन्द्र प्रसाद गुरागाईँले नवनियुक्त सदस्यहरू भीम बहादुर सुब्बा फुदोङ र रुपा थापा ओझालाई पद तथा गोपनियताको शपथ ग्रहण समेत गराएका छन् ।

 शपथ ग्रहण समारोहमा कोशी प्रदेशका प्रदेश प्रमुख परशुराम खापुङ, मुख्यमन्त्री हिक्मत कुमार कार्की, प्रदेश सभामुख अम्बर बहादुर विष्ट लगायत राजनैतिक दलका नेताहरू, मन्त्रीहरू, प्रदेश सांसदहरू, सचिवहरूको उपस्थिति रहेको थियो ।

प्रदेश लोकसेवा आयोगका र्दुइजना सदस्यहरूको ६ वर्षे कार्यकाल समाप्त भएपछि सुब्बा र ओझालाई नियुक्त गरिएको हो ।