काठमाडौं– खाद्य प्रविधि तथा गुण नियन्त्रण विभागले डाबर नेपाल प्रालिद्वारा उत्पादन गरिएको मह बजारबाट तत्काल फिर्ता गर्न आदेश जारी गरेको छ ।

विभागले सार्वजनिक गरेको सूचनाअनुसार बजार अनुगमन तथा निरीक्षणका क्रममा संकलन गरिएको महको नमुना प्रयोगशालामा परीक्षण गर्दा न्यूनस्तरको पाइएपछि उक्त उत्पादन ‘रिकल’ गर्न निर्देशन दिइएको हो ।

विभागका अनुसार खाद्य स्वच्छता तथा गुणस्तर ऐन, २०८१ को दफा ३६(२) बमोजिम डाबर ब्रान्डको ५०० ग्राम मह बजारबाट तत्काल फिर्ता गर्न तथा बिक्री–वितरण रोक्न आदेश जारी गरिएको छ।

रिकल गरिएको उत्पादनको ब्याच नम्बर एन बी ००४७७ रहेको छ । उक्त उत्पादनको उत्पादन मिति सन् २०२५ डिसेम्बर उल्लेख गरिएको छ भने उपभोग अवधि १८ महिना रहेको विभागले जनाएको छ । यो उत्पादन डाबर नेपाल प्रालि, जितपुर सिमरा उपमहानगरपालिका–२३, बाराद्वारा उत्पादन गरिएको विभागको सूचनामा उल्लेख छ ।

विभागले सम्बन्धित उत्पादक कम्पनीलाई तत्काल बिक्री वितरण नगर्न नगराउन तथा बजारबाट उत्पादन फिर्ता गर्न निर्देशन दिएको जनाएको छ ।