काठमाडौं– इनिशा बिक हत्या प्रकरणमा संलग्न दोषीलाई कडा कारबाही गर्न माग गर्दै शनिबार पनि काठमाडौंमा विरोध प्रदर्शन गरिएको छ।

इनिशा बिकलाई न्याय दिलाउन विभिन्न संघसंस्थाको अगुवाइमा माइतीघर मण्डलामा प्रदर्शन आयोजना गरिएको हो। प्रदर्शनमा सहभागीहरूले ‘पीडितलाई न्याय दे’, ‘छोरीहरूको सुरक्षा गरौं’, ‘बलात्कारीलाई कडा कारबाही गर’, ‘न्यायविना शान्ति छैन’ लगायतका नारा लेखिएका प्लेकार्ड प्रदर्शन गरेका थिए।

इनिशा बिकको न्यायका लागि ऐक्यबद्धता जनाउँदै नेपाल सुनचण्डी व्यवसाय तथा कालिगढ सङ्घर्ष समिति समेत प्रदर्शनमा सहभागी भएको थियो।

उक्त प्रकरणमा सुर्खेतको वीरेन्द्रनगरस्थित सामुदायिक वनमा बिक मृत अवस्थामा फेला परेकी थिइन्। प्रहरीले घटनामा संलग्न अभियुक्तहरूसँग बयान लिइसकेको जनाएको छ भने अनुसन्धान अन्तिम चरणमा पुगेको बताइएको छ।