रौतहट– रौतहटको गौर नगरपालिका–६ स्थित सनगढा गाउँमा दुई समुदायबीच सुरु भएको झडपले उग्र रूप लिएको छ । झडप सुरु भएको आज तीन दिन बितिसक्दा पनि नियन्त्रणमा आउन सकेको छैन।  

बिहीबार राति देखिको सामान्य विवाद बढ्दै आज आगजनी र तोडफोडसम्म पुगेको हो ।

प्रहरीका अनुसार एक विवाह समारोहमा बजाइएको बाजागाजालाई लिएर विवाद चर्किएको थियो । गत ७ गते राति हिन्दु समुदायको विवाहमा बाजा बजाइएको विषयलाई लिएर मुस्लिम समुदायले आपत्ति जनाएपछि भनाभन सुरु भएको बताइएको छ । 

मस्जिदमा रात्री प्रार्थना चलिरहेको समयमा बाजा बजाइएको भन्दै विवाद बढ्दै जाँदा केही व्यक्तिमाथि कुटपिटसमेत भएको थियो।

घटनापछि शुक्रबार बिहान दुवै पक्षबीच पुनः ढुंगामुढा भएको र त्यसपछि अवस्था थप तनावपूर्ण बनेको प्रशासनले जनाएको छ। स्थानीय प्रशासनका अनुसार झडप क्रमशः अन्य स्थानमा समेत फैलिँदै गएको छ ।

अहिले सुरक्षा व्यवस्था कडा पारिएको प्रहरीले जनाएको छ  ।