काठमाडौं– दाङको तुलसीपुर–५ स्थित वीरेन्द्र चोकमा रहेको नेकपा एमालेको चुनाव चिह्न अंकित झन्डा जलाएको अभियोगमा प्रहरीले थप दुई जनालाई पक्राउ गरेको छ ।

दाङ प्रहरीका अनुसार पक्राउ पर्नेमा तुलसीपुर– ४ हलवारका ३० वर्षीय रमेश राना मगर र तुलसीपुर– ६ गाइडरका २४ वर्षीय विक्रम परियार रहेका छन् ।

प्रहरीले यसअघि सोही ठाउँका बुद्धि बहादुर बस्नेतलाई पक्राउ गरेको थियो । घटनामा संलग्न अन्य व्यक्तिको खोजी भइरहेको र पक्राउ परेका तीनै जनामाथि थप अनुसन्धान भइरहेको प्रहरीले जनाएको छ ।

यही फागुन ७ गते राति साढे ९ बजेतिर राष्ट्रिय स्वतन्त्र पार्टी (रास्वपा) को नारा लगाउँदै वीरेन्द्रचोकमा सहभागी भएकाहरूले एमालेको चुनाव चिह्न अङ्कित झण्डा जलाएका थिए ।