काठमाडौं- संयुक्त अरब इमिरेट्स यूएईको राज्य सञ्चालित एत्तिहाद जल तथा विद्युत् कम्पनीले यूएई र भारतलाई जोड्ने प्रस्तावित ऊर्जा सञ्जालको फिजबिलिटी अध्ययन गर्ने भएको छ । यसका लागि आशयपत्र माग गरिएको छ ।

एत्तिहादले विज्ञप्ति जारी गर्दै परामर्शदाताहरुलाई जनवरी ३१ सम्म प्राविधिक–आर्थिक अध्ययनको योजना ल्याउन आह्वान गरिएको जनाएको छ । अध्ययनबाट दीर्घकालीन प्राविधिक, आर्थिक र बजार क्षमताबारे सर्वेक्षण हुने अपेक्षा गरिएको छ ।

सर्वेक्षणमा भारत र यूएईबीच प्रत्यक्ष मार्गको सर्वेक्षण, ऊर्जा आदान प्रदानको अवस्था, लागत र लाभको विश्लेषण, ग्रिड प्रभावको मूल्याङ्कजस्ता विषय समेटिने जनाइएको छ । सन् २०२३ मा भारत र यूएईबीच समुद्रमुनी राखिएका तारमार्फत् ग्रिड जडान गर्नेबारे छलफल भएको थियो ।

भारतले अघि सारेको एक सूर्य, एक विश्व र एक ग्रिड कार्यक्रमअन्तर्गत दुई देशबीच ऊर्जा आदान प्रदान हुन लागेको हो ।