काठमाडौं– नेकपा एमालेले नेपाली कांग्रेसबाट एमालेमा प्रवेश गरेका डा. अबुल हुसेन अन्सारीलाई दिएको टिकट खोसेको छ ।

एमाले प्रवेश गरेलगत्तै अध्यक्ष केपी ओलीले उनलाई सुनसरी क्षेत्र नम्बर ४ को टिकट दिएको भएपनि अन्तिममा उनको टिकट खोसेर जगदीश कुशियत दिइएको हो।

केही दिनअघिसम्म कांग्रेसको देउवा समूहको पक्षमा उभिएर गगन थापामाथि आक्रमण गरिरहेका उनले रातारात पार्टी फेरेर एमालेको टिकट लिएका थिए ।

तर एमालेमा पुराना नेताहरुलाई वेवास्ता गर्दै अर्को पार्टीबाट भर्खरै प्रवेश गरेका व्यक्तिलाई टिकट दिएको भन्दै विरोध भएपछि अध्यक्ष ओली टिकट खोस्न बाध्य भएका हुन् ।

कुशियतको नाम सुनसरी–४ बाट एकल सिफारिस भएर आएको थियो । तर त्यसलाई वेवास्ता गर्दै अध्यक्ष ओलीले कांग्रेसबाट आएका अन्सारीलाई टिकट दिएका थिए ।

यसरी टिकट खोसिएपछि हुसेनले जीवन यात्रा भएको र सक्नेले साथ दिने नसक्ने पाठ दिने प्रतिक्रिया दिएका छन् । उम्मेदवार बन्नबाट आफू अन्तिम समयमा बन्चित भएको भन्दै उनले यस्तो बताएका हुन् ।

‘म आफू उम्मेदवार हुन् बाट अन्तिम समयमा वञ्चित भए पनि राजनीति र सामाजिक सेबा मार्फत देश सेवा गर्ने मेरो इमान्दारिता, लगाव र निष्ठामा कुनै कमी आउन दिने थिएन र छैन्। जिवन एउटा यात्रा हो,यहाँ सक्नेले साथ दिन्छन् नसक्नेले पाठ’, उनले फेसबुकमा लेखेका छन्, ‘घाम जस्तै बनु छ , आज आस्ताए पनि भोलि नौलो किरण बनि छाउनु छ । सबैमा शुभबिहानी’