काठमाडौं–  राष्ट्रिय स्वतन्त्र पार्टीकी सांसद आकृति अवस्थीले दसैँका बेला हवाई भाडा अत्यधिक बढेको भन्दै सरकारको ध्यानाकर्षण गराएकी छन् । 

सोमबार प्रतिनिधिसभाको बैठकमा बोल्दै उनले सडक अवरुद्ध हुँदा सुदूरपश्चिम जाने हवाई टिकटको भाडा झन् महँगिएको गुनासो गरिन् ।

उनले व्यङ्ग्यात्मक शैलीमा आन्तरिक हवाई उडानको भाडा जहाजभन्दा छिटो माथि उडिरहेको टिप्पणी गरिन् । दसैँमा घर फर्किने यात्रुको चाप र बाढीपहिरोका कारण सडक अवरुद्ध हुँदा एयरलाइन्सले माग र आपूर्तिको आधारमा भाडा निर्धारण गरे पनि नागरिकका लागि त्यो बाध्यताको मूल्य बनेको उनको भनाइ थियो ।

‘दिल्ली पुग्न सस्तो, आफ्नै सुदूरपश्चिम पुग्न महँगो भयो,’ उनले भनिन्, ‘दिल्लीभन्दा सुदूरपश्चिमलाई सस्तो बनाइदिनुहोस्।’

सांसद अवस्थीले एयरलाइन्स कम्पनीहरूलाई पनि नागरिकको बाध्यताको फाइदा नउठाउन आग्रह गरिन् । उनले भनिन्, ‘भाडा होइन, जहाज उडाउनुहोस् । नाफा कमाउनुहोस्, नागरिकको बाध्यता होइन।’