काठमाडौं– नेकपा (एमाले)को केन्द्रीय कमिटी बैठक सुरु भएको छ । ललितपुरको भनिमण्डलस्थित पार्टी प्यालेसमा सुरु भएको बैठकमा अध्यक्ष केपी शर्मा ओलीले राजनीतिक प्रतिवेदन प्रस्तुत गर्दै छन् ।

पार्टी केन्द्रीय कार्यालय च्यासलमा बसेको सचिवालय बैठकले केन्द्रीय कमिटी बैठकको कार्यसूची तय गरेपछि बैठक सुरु भएको हो । बैठकअघि अध्यक्ष ओलीले सम्बोधन गर्दै केन्द्रीय सदस्यहरूका लागि बैठकमा पालना गर्नुपर्ने कडा नियम सुनाएका छन् ।

ओलीले बैठकमा मोबाइल फोन प्रयोग नगर्न केन्द्रीय सदस्यहरूलाई निर्देशन दिएका छन् । उनले भोलिदेखि बैठक हल बाहिरै मोबाइल राख्ने व्यवस्था गरिने जानकारी दिए ।

‘केन्द्रीय कमिटीको बैठकमा कसैको पनि मोबाइल बिलकुलै नबजोस भन्ने आग्रह गर्छु । भोलिदेखि मोबाइल बैठक हल बाहिर राख्ने काम हुनेछ,’ ओलीले भने ।

उनले बैठकभित्र मोबाइल चलाउने, हेर्ने वा बजाउने अनुमति नहुने स्पष्ट पारे । बैठकमा नेता बोलिरहेका बेला मोबाइलमा कुरा नगर्न र मोबाइल निकालेर भिडियो खिच्न तथा रेकर्ड गर्नसमेत रोक लगाइएको उनले बताए ।

‘मोबाइल रेकर्ड मोडमा राख्न पाइने छैन । भिडियो मोडमा राख्न पाइने छैन । लाइभ गर्न पनि पाइँदैन,’ ओलीले भने, ‘लाइभ गर्नेजति क्यामेराहरूले गर्नेछन् ।’

ओलीले बैठकका क्रममा आफ्नो आसन छाड्दा पनि अध्यक्षको अनुमति लिनुपर्ने र बोल्नुपरे अध्यक्षको ध्यानाकर्षण गराएर अनुमति पाएपछि मात्रै बोल्नुपर्ने नियम सुनाए । विशेष परिस्थितिमा भने अध्यक्षले आवश्यकताअनुसार समय उपलब्ध गराउने उनले बताए ।

गत फागुन २१ गते सम्पन्न प्रतिनिधिसभा निर्वाचनमा एमालेले व्यहोरेको पराजयपछि पहिलो पटक केन्द्रीय कमिटी बैठक बसेको हो । बैठकमा सबै केन्द्रीय कमिटी सदस्यलाई आफ्नो धारणा राख्न समय उपलब्ध गराइने जनाइएको छ ।