काठमाडौं- निजामती कर्मचारी अस्पतालले निजामती कर्मचारी तथा उनीहरूका परिवारलाई लक्षित गर्दै आगामी आइतबारदेखि विशेष ओपीडी सेवा सञ्चालन गर्ने भएको छ।

अस्पतालका अनुसार प्रत्येक आइतबार बिहान ९ बजेदेखि दिउँसो १ बजेसम्म विशेष ओपीडी सञ्चालन हुनेछ। सेवामार्फत कर्मचारी तथा परिवारका सदस्यलाई सहज र व्यवस्थित रूपमा स्वास्थ्य सेवा उपलब्ध गराउने लक्ष्य राखिएको छ।

विशेष ओपीडीमा इन्टरनल मेडिसिन, फेमिली मेडिसिन, स्त्री तथा प्रसूति रोग, छाला रोग, नाक, कान तथा घाँटी (इएनटी), रेडियोलोजी र प्याथोलोजीलगायत सेवा उपलब्ध हुनेछन्।

अस्पतालकी सूचना अधिकारी श्रीरञ्जना नेपालका अनुसार आगामी दिनमा विशेष ओपीडीअन्तर्गत थप विशिष्टीकृत स्वास्थ्य सेवासमेत विस्तार गरिनेछ।

उनका अनुसार निजामती कर्मचारी तथा उनीहरूका परिवारले अस्पतालमा उपचारका लागि लामो समय लाइन बस्नुपर्ने अवस्थाको अन्त्य गर्दै सहज रूपमा स्वास्थ्य सेवा उपलब्ध गराउने उद्देश्यले विशेष ओपीडी सञ्चालन गर्न लागिएको हो।