काठमाडौं– साउन महिनाको पहिलो सोमबार पवित्र तीर्थस्थल चितवनको देवघाटमा भक्तजनको घुइँचो लागेको छ ।

त्रिशुली र कालीगण्डकी नदीको पवित्र बेणीसङ्गममा स्नान गरी भगवान् शिवको पूजा–आराधना तथा दर्शन गर्न देशका विभिन्न जिल्लाबाट श्रद्धालुहरू देवघाट पुगेका हुन् । 

साउन महिना भगवान् शिवलाई समर्पित पवित्र महिना मानिने भएकाले प्रत्येक सोमबार शिवालय तथा धार्मिक तीर्थस्थलहरूमा भक्तजनको विशेष चहलपहल रहने गर्छ ।

देवघाटमा पनि बिहानैदेखि नदीमा स्नान गर्ने, जल अर्पण गर्ने, बेलपत्र चढाउने र शिवको आराधना गर्ने भक्तजनको लाम लागेको देखिएको छ ।

मन्दिर व्यवस्थापन समितिले भक्तजनलाई सहज रूपमा दर्शन र पूजा गर्न आवश्यक व्यवस्थापन मिलाइएको जनाएको छ।

सुरक्षाका लागि नेपाल प्रहरी, सशस्त्र प्रहरी तथा स्वयंसेवक परिचालन गरिएको छ भने भीड व्यवस्थापनमा स्थानीय निकायले समेत सहकार्य गरेका छन् ।