बेइजिङ – रुस र चीनबीच बहुचर्चित ‘पावर अफ साइबेरिया–२’ प्राकृतिक ग्यास पाइपलाइन परियोजनामा केही प्राविधिक प्रगति भए पनि अन्तिम सम्झौता हुन सकेको छैन ।  भ्लादिमिर पुटिन र शी जिनपिङबीच बेइजिङमा भएको उच्चस्तरीय वार्तापछि पनि अर्बौं डलरको ऊर्जा परियोजना निष्कर्षमा पुग्न नसकेको हो ।

सन् २०२२ मा युक्रेनमाथिको आक्रमणपछि पश्चिमी प्रतिबन्धका कारण आर्थिक रूपमा चीनमाथि निर्भरता बढाएको   

रूसले लामो समयदेखि उक्त परियोजना अघि बढाउन प्रयास गर्दै आएको छ । तर चीनले भने परियोजनाप्रति सावधानीपूर्ण र सीमित रुचि देखाउँदै आएको विश्लेषण गरिएको छ ।

क्रेमलिनका प्रवक्तादिमित्री पेस्कोभका अनुसार पाइपलाइनको मार्ग र निर्माण प्रक्रियाबारे दुवै पक्षबीच ‘आधारभूत समझदारी’ बनेको छ । यद्यपि समयसीमा तय हुन नसकेको र केही प्राविधिक तथा व्यावसायिक विषयमा अझै छलफल जारी रहेको उनले बताएका छन् ।

पुटिन–सी वार्तापछि सार्वजनिक गरिएको सम्झौताहरूको सूचीमा भने ‘पावर अफ साइबेरिया–२’ परियोजनाको औपचारिक उल्लेख गरिएको छैन । यसले परियोजनाको भविष्य अझै अनिश्चित रहेको संकेत गरेको छ ।

प्रस्तावित पाइपलाइनमार्फत वार्षिक करिब ५० अर्ब घनमिटर ग्यास चीनतर्फ आपूर्ति गर्ने लक्ष्य राखिएको छ । रुसका लागि रणनीतिक रूपमा महत्त्वपूर्ण मानिएको यो परियोजनाले युरोपतर्फ घटेको ऊर्जा निर्यातको विकल्प उपलब्ध गराउने अपेक्षा गरिएको छ ।

प्रस्तावित मार्गअनुसार पाइपलाइन उत्तरी साइबेरियाको यमाल प्रायद्वीपबाट सुरु भएर मङ्गोलिया हुँदै चीनसम्म करिब दुई हजार ६०० किलोमिटर दूरी पार गर्नेछ ।

विश्लेषकहरूका अनुसार रुसले मध्यपूर्वको तनाव र विश्व ऊर्जा बजारको अस्थिरतालाई अवसरका रूपमा प्रयोग गर्दै परियोजनामा प्रगति गराउने प्रयास गरेको हो । तर चीनले ऊर्जा स्रोतको विविधीकरण, मूल्य स्थायित्व र दीर्घकालीन सुरक्षालाई प्राथमिकता दिँदै यसप्रति अपेक्षाकृत कम उत्साह देखाएको बताइएको छ ।