काठमाडौं-२०८३ वैशाख महिनाको पहिलो साता (१ देखि ६ गतेसम्म) देशभर विभिन्न प्रकृतिका विपद्का घटनामा परी ७ जनाको मृत्यु भएको छ । 

राष्ट्रिय विपद् जोखिम न्यूनीकरण तथा व्यवस्थापन प्राधिकरणले सार्वजनिक गरेको तथ्यांक अनुसार यस अवधिमा विपद्का १४६ वटा घटनाहरू दर्ता भएका छन् ।

पछिल्लो ६ दिनको अवधिमा हावाहुरीका कारण ३ जना, लेक लागेर १ जना, डुंगा पल्टेर १ जना, आगलागी तथा चट्याङबाट २ जना ७ जनाको मृत्यु भएको छ भने १ जना बेपत्ता भएका छन् । ती विभिन्न घटनामा परी ३७ जना घाइते भएका छन् । विपद्का यी घटनाहरूबाट १ सय ४५ परिवार प्रत्यक्ष रूपमा प्रभावित भएका छन् ।

प्राधिकरणको तथ्याङ्कअनुसार यस अवधिमा वन डढेलोका २० वटा घटना दर्ता भएका छन् भने आगलागीका १३ वटा, सर्पदंशका १२ वटा, जनावरको आक्रमणका ७ वटा, चट्याङ्का ४ वटा र हावाहुरीका ३ वटा घटना घटेका छन् । 

यसबाहेक लेक लाग्ने, डुङ्गा पल्टने, भारी वर्षा र बाढीका घटनाहरू समेत गरी १४६ वटा विपद्का घटनाहरू सो अवधिमा रेकर्ड गरिएको छ ।