काठमाडौं– राष्ट्रिय स्वतन्त्र पार्टीले आगामी मन्त्रिपरिषद्को सदस्यहरूबारे छलफल सुरु गरेको छ। बिहीबार बेलुका काठमाडौंको एक होटलमा सभापति रवि लामिछाने, वरिष्ठ नेता बालेन्द्र शाह, उपसभापति स्वर्णिम वाग्ले र डीपी अर्यालबीच संवादपछि शुक्रबारबाट सम्भावित  मन्त्रीहरूबारे  छलफल अघि बढेको हो ।

रवि र बालेन दुवै पक्षबाट केही मन्त्रालयमा एकैजनाको नाम आएको छ । केही मन्त्रालयमा नाम फाइनल भएको छैन। 

‘दुवै नेताले केही मन्त्रालयमा एउटै व्यक्तिलाई चाहनुभएको छ।  अन्य धेरै मन्त्रालयका पात्रबारे  छलफल हुँदैछ । बिहीबार बेलुकाबाट त्यो सुरु भएको छ’, पार्टीका एक नेताले भने, ‘आज  दिउँसो छलफल गर्ने योजना बनाएका छौं ।’

बिहीबार मन्त्रालयमा पठाउने व्यक्ति, संसदीय दलको उपनेता, प्रमुख सचेतक सचेतक लगायत जिम्मेवारीमा कानुन बुझेको व्यक्ति पठाउनुपर्नेबारे छलफल चलेको थियो । 

मन्त्रिपरिषद्सँगै नेताहरूले सभामुख, प्रमुख सचेतक, सचेतक र संसदीय दलको उपनेताको विषयमा पनि छलफल गरिरहेका छन् ।

पार्टीमा सभामुख र प्रमुख सचेतक पद नेतृत्व गर्न सक्ने क्षमता भएको व्यक्तिलाई दिनुपर्ने आवाज उठिरहेको छ ।