काठमाडौं– नेपाली राजनीतिमा कहिल्यै नदेखिएको ‘फ्लाइङ किस’ अभियान यतिबेला राष्ट्रिय स्वतन्त्र पार्टीका सभापति रवि लामिछाने र वरिष्ठ नेता बालेन्द्र शाहले चलाइरहेका छन् । 

उनीहरूले चुनावी सभाको बीचमा कार्यकर्ता तथा समर्थकलाई थप आकर्षित गर्ने उद्देश्यले ‘आई लभ यु’ ‘लभ यु’ जस्ता शब्द प्रयोग गरेर फ्लाइङ किस बाँड्न गरेका हुन् ।

चुनावी अभियानको सुरुवातीदेखि लामिछाने र शाहले फ्लाइङ किस दिने अभियान सञ्चालन गरेपछि उनीहरूसँग मोहित हुने मान्छेहरूले भने उनीहरूको गालामा नै चुम्बन गर्न थालेका छन् । साथै, उनीहरूलाई ढोग र ‘हग’ गर्न खोज्नेको संख्या पनि उत्तिकै देखिएको छ ।

झापामा चुनावी अभियानको क्रममा एकजना युवा उमेरका पुरुषले नेता शाहको गालामा चुम्बन गरेका थिए । जतिबेला उनी स्वयं लजाएका थिए । 

त्यस्तै, बिहीबार चुनावी अभियानको क्रममा सुर्खेतमा सभापति लामिछानेलाई भिडकै बीचमा एक जना महिलाले समातेर नै चुम्बन गरिन । महिलाको चुम्बनले सभापति लामिछाने अप्ठ्यारो मान्दै हाँसिरहेका थिए ।

सामान्यतया, अहिलेसम्म राजनीतिक दलका नेताहरूले सार्वजनिक कार्यक्रममा समुदाय अनुसारको आदर सत्कार गर्ने र दलले अभ्यास गरेको ‘जय नेपाल’, अभिवादन र लालसलाम जस्ता शब्दहरू प्रयोग गरेर आम मानिसहरूलाई अभिभावन गर्ने गर्दथे ।

तर, रास्वपाले भने पछिल्लो पुस्तामा विदेशबाट भित्रिँदै गरेको फ्लाइङ किसको अभ्यासलाई राजनीतिक तथा सार्वजनिक कार्यक्रममा पनि स्थान दिँदा त्यसले सांस्कृतिक रूपमा नयाँ मानक स्थापना गर्न सक्ने देखिएको छ ।