काठमाडौं- नेकपा (एमाले)ले प्रतिनिधिसभा निर्वाचनमा ५४.५४ प्रतिशत नयाँ अनुहार अघि सारेको जिकिर गरेको छ । एमालेको प्रचार संयोजक मीनबहादुर शाहीले मंगलबार पत्रकार सम्मेलनमार्फत नयाँ अनुहारअघि सारेको बताएका हुन् ।

मधेस र सुदूरपश्चिममा ५०/५० प्रतिशत र कोसीमा ५३.५७ प्रतिशत उमेदवार नयाँ भएको उनले बताए । सबैभन्दा धेरै कर्णाली प्रदेशमा ७५ प्रतिशत र कम लुम्बिनीमा ४२.३० प्रतिशत भएको उनको भनाइ छ । वाग्मतीमा ६०.६० र ६१.११ प्रतिशत गण्डकीमा रहेको शाहीले बताए ।

एमालेले यो निर्वाचनलाई आम निर्वाचनको रूपमा लिएको शाही बताउँछन् । ‘हराएका र भत्किएका सपनाहरूलाई फेरि जगाउँदै नयाँ पुस्ताको सुन्दर भविष्य निर्माण गर्ने निर्णायक मोडका रूपमा लिनुका साथै संविधान र लोकतन्त्रको पक्षमा प्रतिगमनविरूद्धको जनमत संग्रहका रूपमा लिएको हुँदा आजको दिनलाई विशेष दिनका रूपमा लिएको छ,’ उनी भन्छन् ।