काठमाडौं- दोस्रो विशेष महाधिवेशनबाट सभापति गगन थापा र निर्वाचन आयोगविरुद्ध मुद्दा लिएर नेपाली कांग्रेसको वैधानिकता गुमाएको शेरबहादुर देउवा पक्षले दर्ता गराएको रिट सर्वोच्च अदालतका न्यायाधीश सुनीलकुमार पोखरेलको इजालसमा सुनुवाइ भइरहेको छ।

पोखरेलको इजलासमा नवौँ नम्बरको पालोमा रहेको उक्त रिटमा अहिले सुनुवाइ चलिरहेको छ। आफूहरूको मान्यता खोसेर थापा पक्षलाई दिने निर्वाचन आयोगको गत शुक्रबारको निर्णयविरुद्ध देउवा पक्षका नेताहरूले आइतबार रिट हालेका थिए ।

रिटको सुनुवाइका लागि मंगलबार पोखरेलको इजालसमा पेशी चढेको छ । तर यो रिट सुनुवाइका लागि अन्तिम नम्बरमा पालो परेको थियो । अन्तिममा पालो परे पनि न्यायाधीश पोखरेलले उक्त रिटमाथि अहिले सुनुवाइ गरिरहेका छन् ।

सोमाबर सार्वजनिक बिदा भएकाले सर्वोच्चले उक्त रिटलाई सुनुवाइका लागि मंगबार पेशीमा चढाउने निर्णय भएको थियो।

मंगलबार फागुन २१ गतेको निर्वाचनका लागि प्रत्यक्षतर्फको मनोनयन दर्ताको तालिका पनि छ । तर कांग्रेसको देउवा समूहका अधिकांश नेताले पनि उम्मेदवारको टिकट सभापति गगन थापाबाट लिइसकेका छन् ।

सर्वोच्चको यो निर्णयले कांग्रेससहित सबै दलको उम्मेदवारी प्रभावित हुने जोखिम बढेको छ। अहिले यो मुद्दाको सुनुवाइ भइरहेकाले केही न केही आदेश आउन सक्छ।

सुनुवाइको पालो पाएकाले कारण देखाऊ या अल्पकालीन अन्तरिम आदेश पनि आउन सक्छ । अथवा छलफलका निम्ति निर्वाचन आयोगसहितका पक्षलाई अर्को मितिमा बोलाउन सक्ने सम्भावना पनि छ ।

देउवा पक्षका प्रचार विभाग प्रमुख मीनबहादुर विश्वकर्माले आफूहरूलाई सोध्दै नसोधी अर्को पक्षलाई मान्यता दिने सर्वोच्चको निर्णयविरुद्ध रिट दर्ता गरेको बताएका थिए ।

कार्यवाहक सभापति पूर्णबहादुर खड्का नेतृत्वका नेताहरू आइतबार सर्वोच्च अदालत पुगेका थिए। निर्वाचन आयोगलले गगनलाई मान्यता दिएपछि विघटित कांग्रेस केन्द्रीय कार्यसमितिको शनिबार सानेपामा बसेको बैठकले सर्वोच्च जाने निर्णय गरेको थियो ।

यस रिटमा सर्वोच्चले यथाशक्य चाँडो आदेश दिनुपर्ने बाध्यता छ । मंगलबार प्रतिनिधिसभाको प्रत्यक्षतर्फको मनोनयन गर्ने समय तोकिएको छ।