काठमाडौं– चर्चित बालगायक अशोक दर्जीले आफू गम्भीर आर्थिक संकटबाट गुज्रिरहेको बताएका छन्। सामाजिक सञ्जाल फेसबुकमा भावुक भनाइ राख्दै झापा निवासी उनले आफ्नो वर्तमान अवस्था र जीवनका संघर्षबारे खुलाएका हुन्।

‘मेरो लाइफमा मैले हार पनि खाएँ, जितेँ पनि, फेरि लडेँ पनि। आज म सडकको बच्चा सडकमै छु,’ उनले लेखेका छन्।

आफूसँग अहिले पैसा तथा बैंक ब्यालेन्स केही नरहेको उल्लेख गर्दै दर्जीले दर्शक–श्रोता र समाजको सहयोगमा बनेको एउटा घर तथा कसैले दिएको अधिया जग्गाबाहेक आफूसँग केही नरहेको बताएका छन्।

संगीतकार टंक बुढाथोकीसँगको पछिल्लो विवाद र सहकार्य अन्त्यतर्फ संकेत गर्दै उनले आफू धेरै थाकिसकेको र अब जीवनलाई सरल ढंगले अघि बढाउन चाहेको बताएका छन्।

बाल्यकालमै सडकमा गीत गाउँदै गर्दा बुढाथोकीले दर्जीलाई पहिचान गरेका थिए। त्यसपछि ‘मन बिनाको धन ठूलो कि धन बिनाको मन’ लगायत गीतमार्फत उनी चर्चामा आएका थिए। उनको परिवारका लागि सर्वसाधारण तथा प्रवासी नेपालीको सहयोगमा घरसमेत निर्माण गरिएको थियो।

चाडपर्व नजिकिँदै गर्दा परिवार र भाइबहिनीको लालनपालन तथा खर्च व्यवस्थापनको चिन्ता रहेको उनले बताएका छन्। ‘अब दशैँ–तिहार आउँदै छ, खर्च कसरी चलाउने ? पढ्नुपर्ने उमेरमा पैसाको भोक र बाध्यता छ,’ उनले लेखेका छन्।

गरिब परिवारमा जन्मनु आफ्नो गल्ती नभएको भन्दै उनले कसैलाई दोष नदिएको बताएका छन्। आफ्ना गल्ती भए माफी माग्दै उनले आत्मबल र हौसला भने बाँकी रहेको बताएका छन्।

दर्जीले आफू छिट्टै नयाँ गीत लिएर दर्शक–श्रोतामाझ आउने तयारीमा रहेको जनाउँदै सबैको निरन्तर साथको अपेक्षासमेत गरेका छन्।