काठमाडाैं – काठमाडौंको चक्रपथअन्तर्गत ललितपुर महानगरपालिकामा पर्ने बालकुमारी पुलदेखि बल्खुसम्मको सडकखण्ड रातको समयमा झलमल्ल देखिन थालेको छ ।

१३ करोड रुपैयाँ लगानीमा जडान गरिएको अत्याधुनिक स्ट्रिट लाइट सञ्चालनमा आएपछि ७.९ किलोमिटर लामो सडकखण्ड रातमा उज्यालो बनेको हो ।

स्ट्रिट लाइट जडानका लागि ललितपुर महानगरपालिकाले १० करोड रुपैयाँ र नेपाल विद्युत् प्राधिकरणले ३ करोड रुपैयाँ लगानी गरेका छन् ।

लाइट सञ्चालनमा आएपछि रातको समयमा सडकमा आवतजावत गर्ने सवारी चालक तथा पैदलयात्रीलाई सहज भएको छ । सडक उज्यालो बनेसँगै रातको समयमा हुने आवतजावत थप सुरक्षित हुने अपेक्षा गरिएको छ ।

बालकुमारीदेखि बल्खुसम्मको सडकखण्डमा जडान गरिएका अत्याधुनिक लाइटका कारण रातमा सडकको दृश्यसमेत आकर्षक देखिएको छ । ड्रोनबाट खिचिएका तस्बिरमा पूरै सडकखण्ड उज्यालो र व्यवस्थित देखिन्छ ।

यसले पैदलयात्री तथा सवारी चालकलाई मात्रै सहज बनाएको छैन, रातको समयमा त्रिभुवन अन्तर्राष्ट्रिय विमानस्थलमा अवतरण गर्ने यात्रुले समेत विमानबाट उज्यालो सडक र ललितपुरको आकर्षक दृश्य देख्न सक्ने भएका छन् ।

सडकमा पर्याप्त प्रकाशको व्यवस्था भएपछि रातको समयमा यात्रा गर्ने सर्वसाधारणले सुरक्षित महसुस गर्ने र सडकको सौन्दर्यसमेत बढ्ने अपेक्षा गरिएको छ ।

तस्बिर : सुर्याम्स उप्रेतीरनेपाल फोटो लाइब्रेरी