काठमाडौं– नेपाली कांग्रेस संस्थापन इतर समूहका नेता डा. प्रकाश शरण महतले सभापति गगन थापाहरूले संवाद गर्न नचाहेको बताएका छन् । 

पूर्व सभापति शेरबहादुर देउवासँग संवाद नगरी महाधिवेशन गर्नका लागि आवश्यक गतिविधि अगाडि बढाएको महतको ठहर छ ।

पाँच महिनापछि साउन २८ गते नेपाल आएका पूर्वसभापति देउवा र पार्टी सभापति थापाबीच अहिलेसम्म भेटवार्ता र फोनमासमेत कुराकानी नभएको महतले खुलाए । 

‘पार्टी सभापति नेपाल आएपछि न फोन सम्पर्क न भेटघाट कुनै पनि ढङ्गबाट गगनजीहरूले कुरा गर्न चाहनुभएको छैन । उहाँहरू नै एकलौटी ढंगले महाधिवेशन अगाडि बढाउने तयारीमा हुनुहुन्छ त्यसकारण समस्या छ । कम्तीमा अदालतको फैसलापछि अगाडि बढिदिएको भए पनि हुन्थ्यो ।’ महतले खबरहबलाई भने, ‘हामीसँग संवाद गर गर भन्दै हामीले सम्पर्क गर्ने कुरा भएन मिलाउन त उहाँहरू नै पहलमा लाग्नुपर्ने हो तर अहिलेसम्म कुनै जानकारी छैन । अदालतको निर्णयपछि हामी पनि एउटा दिशामा पुग्छौँ ।’

महतले आफूले पर्खिरहेको र भोलि केही कार्य योजनासहित खुलासा गर्ने समेत जानकारी दिए ।