काठमाडौं– नेपाली कांग्रेसले शिक्षामा बजेटको २० प्रतिशत लगानी गर्ने नीति लिएको छ । फागुन २१ गते हुने प्रतिनिधिसभाको निर्वाचन लक्षित घोषणापत्रमा कांग्रेसले सो नीति समावेश गरेको हो ।

‘सरकारी र सामुदायिक विद्यालयमा शिक्षक, पूर्वाधार, उपकरण आदि उपलब्ध गराउन हामी आवश्यक लगानीको व्यवस्था गर्छौं’, कांग्रेसको घोषणापत्रमा भनिएको छ, ‘विद्यालय शिक्षामा स्रोतको व्यवस्थापन गर्न एसडिजी मा नेपालले गरेको शिक्षामा बजेटको २० प्रतिशत राज्यको लगानी गर्ने प्रतिबद्धता पूरा गरेर सुनिश्चित गर्छौं ।’

विद्यालय शिक्षालाई गुणस्तरीय बनाउन स्थानीय र प्रदेश सरकारसँग सहकार्य गर्ने नीति कांग्रेसले लिएको छ । तर, कांग्रेसले झण्डै ३० प्रतिशत विद्यार्थीले अध्ययन गर्ने निजी विद्यालयको नियमनको विषयमा भने घोषणापत्रमा मौनता प्रकट गरेको छ ।