काठमाडौं – गृहमन्त्री सुधन गुरुङले विपद् व्यवस्थापनमा गृह मन्त्रालय संवेदनशील भएर काम गरिरहेको बताएका छन् ।

प्रतिनिधि सभाको बुधबारको बैठकमा सांसद गोपाल शर्माले जाजरकोट र रुकुम पश्चिमका विपद् प्रभावित नागरिकको उद्धार तथा राहतका विषयमा सोधेको प्रश्नको जवाफ दिँदै मन्त्री गुरुङले यस्तो बताएका हुन् ।

उनले विपद्बाट प्रभावित एक परिवारबाट एक जनाले मात्र लाभ पाउने कानुनी व्यवस्था रहेको जानकारी दिए । एकभन्दा बढी व्यक्तिलाई लाभ दिनुपर्ने अवस्थामा विपद् आउनुअघि नै अंशबण्डा गरी छुट्टिएर बसेको हुनुपर्ने कानुनी व्यवस्था रहेको उनले स्पष्ट पारे ।

मन्त्री गुरुङले उक्त व्यवस्था संशोधन गर्न तथा स्थानीय तहलाई विपद् व्यवस्थापनमा थप जिम्मेवार बनाउन विपद् प्राधिकरणका कार्यकारी प्रमुखको संयोजकत्वमा कार्यदल गठन गरिएको बताए। कार्यदलले आवश्यक काम अघि बढाइरहेको उनको भनाइ छ ।

स्थानीय तहमा भवन निर्माण गर्दा भवन निर्माण संहिता पालना गर्नुपर्ने व्यवस्था रहेको उल्लेख गर्दै उनले त्यसका लागि आवश्यक समन्वय र सहजीकरण भइरहेको जानकारी दिए ।

विपद् व्यवस्थापन तीनै तहका सरकारको साझा जिम्मेवारी भएकाले सोहीअनुसार समन्वय र सहकार्य भइरहेको पनि गृहमन्त्री गुरुङले स्पष्ट पारे ।