काठमाडौं- जलविज्ञान तथा जलस्रोत अनुसन्धान केन्द्रको कार्यकारी निर्देशकमा सञ्जीव बराल नियुक्त भएका छन्। बरालले बुधबार बबरमहलस्थित केन्द्रको कार्यालय पुगेर पदभार ग्रहण गरेका छन्।

यसअघि जलस्रोत तथा सिँचाइ विभागको महानिर्देशक तथा बागमती प्रदेशको सचिवका रूपमा काम गरेका बरालसँग ऊर्जा तथा जलस्रोत क्षेत्रमा करिब १८ वर्षको अनुभव छ।

उनले भेरी–बबई बहुउद्देश्यीय आयोजना र बूढीगंगा जलविद्युत् आयोजनाको नेतृत्वसमेत गरिसकेका छन्।

साविकको जलस्रोत तथा ऊर्जा अनुसन्धान केन्द्र र जल तथा मौसम विज्ञान विभागअन्तर्गतका जलविज्ञानसम्बन्धी शाखा तथा महाशाखालाई एकीकृत गरी जल तथा ऊर्जा आयोगको सचिवालयअन्तर्गत यो केन्द्र स्थापना गरिएको हो।

केन्द्रले जलविज्ञानसम्बन्धी तथ्यांक संकलन, अनुसन्धान तथा व्यवस्थापनसँगै बाढी, पहिरो र अन्य जलजन्य विपद्को पूर्वसूचना प्रणाली विकासमा काम गर्नेछ।

यसका साथै आधुनिक प्रविधिको प्रयोगमार्फत जलस्रोत अनुसन्धान र जलवायुजन्य जोखिम न्यूनीकरणलाई प्राथमिकता दिने जनाएको छ।