वासिङ्टन- अमेरिकी राष्ट्रपति डोनाल्ड ट्रम्पले इरानसँग तत्काल वार्ता वा छलफल गर्ने कुनै ठोस योजना नरहेको बताएका छन् ।

सामाजिक सञ्जाल ‘ट्रुथ’मार्फत ट्रम्पले अमेरिका र इरानबीच अहिले कुनै वार्ता वा कुराकानी नभइरहेको तथा तत्कालका लागि वार्ताको कुनै योजना नरहेको उल्लेख गरेका हुन् ।

यसैबीच, ट्रम्पले होर्मुज जलडमरूमध्यमा अमेरिकी नौसैनिक नाकाबन्दी पूर्ण शक्ति र प्रभावमा रहेको दाबी गर्दै जलमार्ग पूर्ण रूपमा खुला र निर्वाध रूपमा सञ्चालनमा रहेको बताए ।

ट्रम्पको यस्तो भनाइ अमेरिकी राष्ट्रपतिका विशेष दूत जारेड कुशनरले ‘फक्स न्युज’सँग अमेरिकी र इरानी सरकारका विभिन्न निकायबीच वार्ता पहिलेभन्दा बढी सक्रिय रहेको बताएपछि आएको हो । यद्यपि, कुशनरले वार्ताबाट अहिलेसम्म कुनै ठोस सहमति नभएको संकेत गरेका छन् ।

होर्मुज जलडमरूमध्यमा तनाव कायमै रहेका बेला अमेरिका र इरानबाट परस्पर विरोधी धारणा सार्वजनिक भएका छन् । इरानले अमेरिकी नौसैनिक नाकाबन्दी तथा प्रतिबन्ध हटाउनेलगायत समझदारीमा उल्लेखित प्रतिबद्धता पूरा नभएसम्म जलमार्ग खुला नगर्ने अडान दोहोर्‍याएको छ ।

उता, कुशनरले अमेरिकी र इरानी सरकारभित्रका विभिन्न पक्ष तथा विभिन्न तहमा वार्ता भइरहेको दाबी गरे ।

यससँगै इरान र अमेरिकाबीचको कूटनीतिक संवाद र होर्मुज जलडमरूमध्यको अवस्थालाई लिएर थप तनाव उत्पन्न हुने संकेत देखिएको छ ।