काठमाडौं– प्रधानमन्त्री वालेन्द्र शाहले नवीन सोचका साथ आफ्नै पुस्ताका लागि स्वदेशमै रोजगारी सिर्जना गर्न जेन-जी उमेर समूहका सांसदहरूलाई आग्रह गरेका छन् । 

शुक्रबार सिंहदरबारमा जेन-जी उमेर समूहका सांसदहरूसँग अन्तरक्रियाका क्रममा प्रधानमन्त्री शाहले जनजीविकाका आधारभूत समस्या समाधानसँगै त्यो भन्दा अझ अगाडि बढेर आफ्नो पुस्तालाई आत्मनिर्भर बनाउन अग्रसर हुन आव्हान समेत गरे । 

यसका लागि स्थलगत अध्ययन तथा अनुसन्धान गर्ने, सूचना–प्रविधिको उच्चतम प्रयोग गर्ने, समस्या समाधानमुखी व्यवहार अपनाउने र पुराना तथा अव्यवहारिक सोच त्याग्न उनले सुझाव दिए ।

साथै प्रधानमन्त्री शाहले राजनीतिलाई पेशा नबनाई आम्दानीको छुट्टै व्यवसायीक आधार खडा गर्दै दीर्घकालिन रुपमा आत्मनिर्भर र प्रेरणाको स्रोत बन्न समेत आग्रह गरेको रास्वपा सांसद केपी खनालले जानकारी दिए ।

छलफलमा सांसदहरूले आफ्नै पुस्तालाई आत्मनिर्भर बनाउन र स्वदेशमै अवसर सिर्जना गर्ने कार्यमा जुट्ने प्रतिबद्धता व्यक्त गरेका थिए ।