रसुवा- माथिल्लो त्रिशुली जलविद्युत आयोजना–१ बाट ६ जनाको शव शुक्रबार निकालिएको छ ।

गत भदौ १० गते रसुवास्थित भोटेकोशी हुँदै आएको भीषण बाढीमा आयोजनाभित्रको सुरुङमास पसेपछि थुनिएर ज्यान गुमाएकामध्ये ६ जनाको शव निकालिएको नेपाली सेनाले जनाएको छ । 

नेपाली सेना र आयोजनाका प्राविधिकसहितको संयुक्त टोलीले खोजीका क्रममा सुरुङभित्र ढलान गर्न बुनिएको डण्डीको जालीको भित्री भागमा अल्झिएको अवस्थामा ती शव फेला परेका हुन् ।

ग्रिण्डर, ग्यास कटर र रोटरी रेस्क्युको सहयोगमा ती शव बाहिर निकालिएको सेनाले उल्लेख गरेको छ । टनेलभित्र हिलोमा छोपिएको अवस्थामा थप अरू पनि शवजस्तो आकृति देखिएकाले खोजी जारी रहेको सेनाले बताएको छ।

बाढीको २२ औँ दिनमा उद्धारकर्मीले बुधबार चिलिमे जलविद्युत आयोजनाबाट पाँच जनाको शव र एउटा खुट्टा बाहिर निकालेका थिए।