काठमाडौं- विशेष अदालतले नेपाल टेलिकमका पूर्व प्रवन्ध निर्देशक सुनिल पौडेललाई घुस लिएको आरोपमा आठ वर्ष कैद सजाय तोकेको छ ।

अदालतले भ्रष्टाचार (गैरकानुनी सम्पत्ति आर्जन) मुद्दामा दोषी ठहर भएका राष्ट्रिय सूचना प्रविधि केन्द्रका तत्कालीन कार्यकारी निर्देशक पौडेललाई साढे आठ वर्ष कैद र १ करोड ५४ लाख २५ हजार २०० जरिवानाको सजाय बिहीबार सुनाएको हो।

विशेष अदालतका अध्यक्ष सुदर्शनदेव भट्ट तथा सदस्यहरू हेमन्त रावल र डिल्लीरत्न श्रेष्ठको इजलासले बिहीबार सजाय निर्धारण गर्दै पौडेललाई ८ वर्ष कैदका साथै सार्वजनिक पदमा रहेको अवस्थामा कसुर गरेको ठहर गर्दै भ्रष्टाचार निवारण ऐन, २०५९ को दफा २४ बमोजिम थप ६ महिना कैद सजाय हुने फैसला गरेको हो।

उक्त मुद्दामा सहप्रतिवादी दीपक आनन्दलाई पनि ८ वर्ष कैद र १ करोड ५४ लाख २५ हजार २०० जरिवाना हुने अदालतले फैसला गरेको छ।

अदालतका अनुसार प्रतिवादीद्वयले तत्कालीन विनिमय दरअनुसार नेपाली ३ करोड ८ लाख ५० हजार ४०० बराबर हुने २ लाख ८० हजार अमेरिकी डलर घुस लिन–दिन सहमति जनाएको मिसिलमा संलग्न संवादलगायतका प्रमाणबाट पुष्टि भएको छ।

यद्यपि, उक्त घुस रकम बरामद नभएको तथा रकम कहाँ राखिएको वा कुन बैंकमा जम्मा गरिएको भन्ने तथ्य वस्तुनिष्ठ रूपमा स्थापित हुन नसकेको अदालतले उल्लेख गरेको छ।

अदालतले अपराध पीडित संरक्षण ऐन, २०७५ को दफा ४१(३) बमोजिम दुवै प्रतिवादीबाट जनही रु. ६ लाख १७ हजार ८ असुल गरी पीडित राहत कोषमा जम्मा गर्न पनि आदेश दिएको छ।

विशेष अदालतले पूर्णपाठ तयार हुन समय लाग्ने भएकाले हाल संक्षिप्त फैसला सार्वजनिक गरेको जनाएको छ।