काठमाडौँ– नेपालमा हाल पश्चिमी र स्थानीय वायुको आंशिक प्रभावले पहाडी तथा हिमाली भूभागमा बदली भएको छ। जल तथा मौसम विज्ञान विभाग, मौसम पूर्वानुमान महाशाखाका अनुसार तराई क्षेत्रमा भने मौसम मुख्यतया सफा रहेको छ।

आज दिउँसो कोशी प्रदेशका पहाडी भूभागलगायत देशका हिमाली क्षेत्रमा साधारणतया बदली रहने महाशाखाले जनाएको छ। बाँकी पहाडी भूभागमा आंशिक बदली हुने र तराईमा घाम लाग्ने सम्भावना छ।

महाशाखाका अनुसार कोशीका पहाडी र हिमाली भूभागका थोरै स्थान तथा गण्डकी प्रदेशका पहाडी र बाँकी हिमाली क्षेत्रका एक–दुई स्थानमा मेघगर्जन र चट्याङसहित हल्का वर्षाको सम्भावना छ। उच्च हिमाली भेगका केही स्थानमा हल्का हिमपात हुनसक्ने पूर्वानुमान गरिएको छ।

आज राति कोशी र गण्डकी प्रदेशका हिमाली क्षेत्रमा साधारणतया बदली रहनेछ। लुम्बिनी र सुदूरपश्चिमसहित बाँकी पहाडी क्षेत्रमा आंशिक बदली भए पनि तराईको मौसम सफा रहने महाशाखाको बुलेटिनमा उल्लेख छ। कोशी र गण्डकीका हिमाली भूभागका एक–दुई स्थानमा राति पनि हल्का वर्षा र हिमपातको सम्भावना छ।