चितवन- फागुन २१ गतेको प्रतिनिधिसभा निर्वाचन नजिकिँदै जाँदा चितवन क्षेत्र नं. ३ को राजनीतिक माहोल तातिएको छ ।

त्यहाँ राष्ट्रिय स्वतन्त्र पार्टीकी सोविता गौतम र नेपाली कम्युनिस्ट पार्टी (नेकपा) की उम्मेदवार रेनु दाहालबीच कडा टक्कर हुने देखिएको छ।

काठमाडौं २ बाट झरेकी सोविताको चुनौती स्वीकार्दै रेनुले आफ्नो चुनावी अभियानलाई तीव्र बनाएकी छन् ।

भरतपुर महानगरपालिकाकी निवर्तमान मेयर दाहालले घरदैलो कार्यक्रममार्फत् स्थानीयका गुनासा, समस्या र सुझाव संकलन गर्दै विकासका एजेण्डासहित मत मागिरहेकी छन् ।

भरतपुर वडा नं. २६ लहुरेचोकबाट घरदैलो सुरू गर्दै वडाका सबै टोल पुगेर दाहालले मत मागिरहेकी छन् । उनले आफू नयाँ अनुहार नभई काम गरेर देखाइसकेको भएको भन्दै जनतासँग गरेको वाचा पूरा गरिछाड्ने बताएकी छन् ।

कृषि, पर्यटन र शिक्षाका मुद्दालाई जोडेर चितवनको विकास गर्ने आफ्नो एजेन्डा रहेको भन्दै उनले निकुञ्ज ऐनमा संशोधन गरि नयाँ ऐन ल्याउनुपर्ने उल्लेख गरिन् ।

दाहालले स्थानीय पूर्वाधार विकास, कृषि आधुनिकीकरण, महिला सशक्तीकरण, युवा स्वरोजगार तथा उद्यमशीलता प्रवर्द्धनलाई आफ्नो प्राथमिकतामा राखेकी छन् ।

२०७९ को निर्वाचनमा यस क्षेत्रबाट राप्रपाका उम्मेदवार विक्रम पाण्डे विजयी भएका थिए ।