काठमाडौं – नेपाली कांग्रेसबाट कारबाहीमा परेपछि २०७९ को प्रतिनिधि सभा निर्वाचनमा सर्लाहीबाट स्वतन्त्र निर्वाचित डा. अमरेशकुमार सिंह राष्ट्रिय स्वतन्त्र पार्टी (रास्वपा)मा प्रवेश गर्ने भएका छन्।

विघटित प्रतिनिधि सभाका सांसद सिंहले शुक्रबार सामाजिक सञ्जाल फेसबुकमार्फत नयाँ राजनीतिक यात्रा सुरु गर्न लागेको जानकारी दिएका हुन्। उनले माघ ५ गते जनकपुरधाममा हुने रास्वपाको कार्यक्रममा सहभागी भई पार्टी प्रवेश गर्ने घोषणा गरेका छन्।

सिंहले फेसबुकमा लेखेका छन्, ‘यही माघ ५ गते जगत जननी माता सिताको जन्मस्थल जनकपुरधाममा हुने राष्ट्रिय स्वतन्त्र पार्टीको कार्यक्रमबाट आफ्नो नयाँ राजनीतिक अध्यायको सुरुवात गर्दैछु।’

उनले स्वतन्त्र रहँदा देश र मधेशमा भ्रष्टाचार र कुशासनविरुद्ध उठाएको आवाज अब अझ बुलन्द हुने उल्लेख गरेका छन्। साथै मधेशमा शिक्षा, स्वास्थ्य, रोजगारी र भौतिक पूर्वाधारको विकास चाहने सबैलाई कार्यक्रममा जोडिन आह्वान गरेका छन्।

उनले भने, ‘देश र मधेशको हित चाहने, शिक्षा स्वास्थ्य रोजगार र भौतिक पूर्वाधारको विकास चाहने सम्पूर्ण आमाबुवा तथा दिदीबहिनीहरूलाई यसै कार्यक्रममार्फत जोडिन आह्वान गर्दछु।’ डा. सिंहको रास्वपा प्रवेशले मधेशकेन्द्रित राजनीतिमा नयाँ तरंग ल्याउने देखिएको छ ।