काठमाडौं- भारत सरकारको आर्थिक सहयोगमा झापाको शिवसताक्षी नगरपालिका–६ स्थित श्री जन आदर्श माध्यमिक विद्यालयको नयाँ भवन निर्माण सुरू भएको छ।

विद्यालय भवनको सोमबार कोशी प्रदेश सभा सदस्य राधाकृष्ण खनाल, शिवसताक्षी नगरपालिकाका मेयर मेगाहाङ्ग थोप्रा र काठमाडौंस्थित भारतीय राजदूतावासका द्वितीय सचिव गरिमा नौटियालले संयुक्त रूपमा शिलान्यास गरेका हुन्।

भारतीय राजदूतावासका अनुसार करिब तीन करोड रुपैयाँ लागतमा निर्माण हुने उक्त भवन भारत सरकारको आर्थिक सहयोगअन्तर्गत उच्च प्रभाव सामुदायिक विकास परियोजना (एचआईसीडीपी) मार्फत निर्माण गरिनेछ। परियोजनाको कार्यान्वयन शिवसताक्षी नगरपालिकाले गर्नेछ।

शिलान्यास कार्यक्रममा स्थानीय जनप्रतिनिधि तथा सरोकारवालाले भारत सरकारले उपलब्ध गराउँदै आएको विकास सहयोगको प्रशंसा गर्दै नयाँ विद्यालय भवनले विद्यार्थी र शिक्षकका लागि गुणस्तरीय तथा सुरक्षित सिकाइ वातावरण सिर्जना गर्ने विश्वास व्यक्त गरेका थिए।

राजदूतावासले नेपाल र भारतबीच नजिकको छिमेकी सम्बन्धका आधारमा शिक्षा, पूर्वाधारलगायत विभिन्न क्षेत्रमा सहकार्य हुँदै आएको उल्लेख गरेको छ।

यस्ता उच्च प्रभाव सामुदायिक विकास परियोजनाले स्थानीय पूर्वाधार विकासका साथै नेपाल सरकारको विकास र समृद्धिको प्रयासलाई सहयोग पुर्‍याइरहेको विज्ञप्तिमा जनाइएको छ।