काठमाडौं- आसन्न प्रतिनिधि सभा निर्वाचनका लागि सार्वजनिक प्रतिबद्धता पत्रमा उज्यालो नेपाल पार्टी ले संघीय र प्रदेशसभाको संरचनामा व्यापक पुनर्संरचना गर्ने प्रस्ताव अघि सारेको छ।

शासन खर्च घटाउने, निर्णय प्रक्रियालाई छरितो बनाउने र स्थायित्व बढाउने लक्ष्यसहित पार्टीले सांसद संख्या र मन्त्रालय घटाउने एजेन्डा प्रस्तुत कुलमान घिसिङ नेतृत्वको यस दलले गरेको हो।

पार्टीले आइतबार ल्याएको प्रतिबद्धता पत्रमा प्रतिनिधिसभा सदस्य संख्या हालको २७५ बाट २०१ मा झार्ने प्रस्ताव गरेको छ।

त्यस्तै प्रदेशसभाको संख्या ५५० बाट ३३० मा सीमित गर्ने योजना अघि सारिएको छ।

संघीय तहमा मन्त्रालय संख्या १५ मा सीमित गर्ने योजना पनि यस पार्टीले ल्याएको छ । उता प्रदेशमा ५ देखि ७ वटासम्म मात्रै मन्त्री राख्ने प्रस्ताव गरिएको छ। दुवै सरकारमा राज्यमन्त्री र सहायकमन्त्रीको व्यवस्था नराख्ने स्पष्ट उल्लेख गरिएको छ।

प्रदेश तहमा राजनीतिक स्थायित्वका लागि प्रत्यक्ष निर्वाचित मुख्यमन्त्रीको अवधारणासमेत प्रतिबद्धता पत्रमा समेटिएको छ।

सरकार गठनपछि हरेक वर्ष प्रतिबद्धता कार्यान्वयनको प्रगति ‘रिपोर्ट कार्ड’ सार्वजनिक गर्ने व्यवस्था गरिने पार्टीले जनाएको छ।

पार्टीका अनुसार संघीय संरचनालाई नागरिकमैत्री, किफायती र परिणाममुखी बनाउने उद्देश्यले यो पुनर्संरचना प्रस्ताव गरिएको हो।

प्रशासनलाई डिजिटल, पारदर्शी र जवाफदेही बनाउने तथा सार्वजनिक पदाधिकारीको वार्षिक अनलाइन सम्पत्ति विवरण सार्वजनिक गर्ने व्यवस्था पनि यसै सुधार प्याकेजअन्तर्गत राखिएको छ।