वालिङ (स्याङ्जा) – ऋषिपञ्चमीका अवसरमा आँधीखोलामा स्नान गर्ने क्रममा खोलाले बगाउँदा मङ्गलबार बिहान एक महिलाको मृत्यु भएको छ।

मृत्यु हुनेमा वालिङ नगरपालिका–९ भूम्रेकी ५३ वर्षीया माया पाण्डे रहेको वडा प्रहरी कार्यालय वालिङका प्रहरी नायब उपरीक्षक प्रताप पौडेलले जानकारी दिए।

प्रहरीका अनुसार भूम्रेस्थित आँधीखोलामा नुहाउने क्रममा पाण्डेलाई खोलाको बहावले बगाएको थियो। घटनालगत्तै वडा प्रहरी कार्यालय वालिङको टोली, स्थानीय जनप्रतिनिधि र सर्वसाधारण खोजीमा खटिएका थिए।

खोजतलास गर्ने क्रममा घटनास्थलभन्दा करिब चार किलोमिटर तल वालिङ–१३ स्थित शान्तिघाटमा आँधीखोलाको ढुङ्गामा अड्किएको अवस्थामा उनको शव फेला परेको प्रहरीले जनाएको छ।