काठमाडौं– स्वास्थ्य तथा जनसङ्ख्या मन्त्रालयले देशभरका सरकारी स्वास्थ्य संस्थालाई सरकारी लेखा प्रणाली (सीजीएएस) र एक्रुअल बेसिस लेखांकन प्रणाली प्रभावकारी रूपमा लागू गर्न निर्देशन दिएको छ ।

मन्त्रालयले जारी गरेको निर्देशनअनुसार आर्थिक पारदर्शिता, वित्तीय अनुशासन र लेखा परीक्षणलाई प्रभावकारी बनाउन सीजीएएस प्रणालीको प्रयोग अनिवार्य गरिएको हो। महालेखा परीक्षकको कार्यालयको प्रतिवेदन तथा विद्यमान वित्तीय व्यवस्थापनमा देखिएका कमजोरीलाई सुधार गर्ने उद्देश्यले यो निर्देशन जारी गरिएको मन्त्रालयले जनाएको छ ।

पत्रमा सरकारी अस्पताल तथा स्वास्थ्य संस्थाहरूले आम्दानी–खर्च, दायित्व, सम्पत्ति व्यवस्थापनलगायतका विवरणहरू एक्रुअल बेसिसमा अभिलेख राख्नुपर्ने, नियमित रूपमा अद्यावधिक गर्नुपर्ने र सम्बन्धित निकायमा समयमै प्रतिवेदन पेस गर्नुपर्ने उल्लेख छ ।

मन्त्रालयले तोकिएको मापदण्डअनुसार प्रणाली कार्यान्वयन नगरेमा भविष्यमा लेखा परीक्षण तथा प्रशासनिक कारबाहीमा समस्या आउन सक्ने चेतावनीसमेत दिएको छ। साथै, सबै स्वास्थ्य संस्थालाई आन्तरिक नियन्त्रण प्रणाली सुदृढ गरी वित्तीय सुशासन कायम गर्न आग्रह गरिएको छ।

स्वास्थ्य मन्त्रालयका अनुसार यस कदमले सरकारी स्वास्थ्य सेवामा पारदर्शिता बढाउने, खर्च नियन्त्रण गर्ने र सेवा प्रवाहलाई थप प्रभावकारी बनाउने अपेक्षा गरिएको छ ।