काठमाडौं- चार दिनदेखि जारी नेपाली कांग्रेसको दोस्रो विशेष महाधिवेशनअन्तर्गत नयाँ नेतृत्वका लागि मनोनयन दर्ता सकिएको छ।

काठमाडौंको भृकुटीमण्डपमा जारी विशेष महाधिवेशनअन्तर्गत मंगलबारदेखि जारी मनोनयन दर्ता कार्यक्रम बुधबार बिहान सकिएको हो ।

यद्यपि कुन पदमा कस-कसले मनोनयन दर्ता गराए भन्ने खुलिसकेको छैन । स्रोतका अनुसार सभापतिमा गगन थापाको मात्रै उम्मेदवारी परेको छ।

मनोनयन दर्ता सकिएसँगै अब महामन्त्रीद्वय गगन थापा र विश्वप्रकाश शर्माले महाधिवेशनलाई मतदान प्रक्रियामा लैजाने तयारी गरेका छन् ।

निर्वाचन समिति संयोजक वरिष्ठ अधिवक्ता सीताराम केसीका अनुसार तलमाथि नभए बुधबार नै विद्युतीय भोटिङ मेशिनबाट नयाँ नेतृत्व छान्न मतदान प्रक्रिया थालिने भएको छ।

निर्वाचन समितिले अहिलेसम्म कुन पदमा कतिजनाको उम्मेदवारी परेको विवरण सार्वजनिक गरिसकेको छैन ।

‘मनोनयन दर्ताको समय सकियो, उम्मेदवारहरूको नामावली १ बजे सार्वजनिक गर्छौं’, निर्वाचन समिति संयोजक केसीले भने ।