काठमाडौं– स्वास्थ्य, जनसङ्ख्या तथा खानेपानी मन्त्री निशा मेहता र संयुक्त राष्ट्र विकास कार्यक्रम (युएनडीपी) का प्रतिनिधिहरूबीच शिष्टाचार भेटवार्ता भएको छ ।

मन्त्रालयमा भएको भेटका क्रममा युएनडीपीका प्रतिनिधिहरूले नवनियुक्त मन्त्री मेहतालाई बधाई दिँदै नेपालको स्वास्थ्य क्षेत्र सुदृढीकरण, सार्वजनिक खरिद प्रणाली सुधार तथा ग्लोबल फण्डअन्तर्गतका कार्यक्रमहरूमा निरन्तर प्राविधिक तथा संस्थागत सहयोग गर्ने प्रतिबद्धता व्यक्त गरेका छन् ।

मन्त्री मेहताले सरकारको १०० बुँदे शासकीय सुधार कार्ययोजनालाई उच्च प्राथमिकतामा राख्दै स्वास्थ्य प्रणालीको डिजिटल रूपान्तरणलाई तीव्र बनाउने लक्ष्य प्रस्तुत गरिन् । उनले अस्पतालहरूलाई क्रमशः पेपरलेस प्रणालीतर्फ लैजाने सरकारी योजनामा युएनडीपीको प्राविधिक सहयोग महत्वपूर्ण हुने अपेक्षा व्यक्त गरिन् ।

उनका अनुसार यस्तो सहकार्यले नेपालको स्वास्थ्य सेवा प्रणालीलाई थप आधुनिक, पारदर्शी र जनमुखी बनाउन निर्णायक भूमिका खेल्नेछ । भेटवार्तामा दुवै पक्षले आगामी दिनमा सहकार्यलाई अझ प्रभावकारी बनाउँदै स्वास्थ्य क्षेत्र सुधारका कार्यक्रमहरूलाई गति दिने विषयमा समेत जोड दिएका थिए ।