काठमाडौं- प्रमुख प्रतिपक्षी दल नेपाली कांग्रेसका सांसद अर्जुननरसिंह केसीले प्रधानमन्त्री वालेन्द्र शाहले लगातार संसद्को उपेक्षा गरिरहेको आरोप लगाएका छन्।

बुधबार बसेको प्रतिनिधि सभाको बैठकमा बोल्दै उनले नीति तथा कार्यक्रममाथिको छलफलमा प्रधानमन्त्री शाहको अनुपस्थिति स्वीकार्य नहुने बताएका हुन्।

केसीले प्रधानमन्त्री उपस्थित नभएको अवस्थामा कुनै मन्त्रीले नीति तथा कार्यक्रममाथिको छलफल प्रस्ताव टेबल गर्नु संसदीय परम्परा रहेको उल्लेख गर्दै त्यसमा आफूहरूको आपत्ति नरहेको बताए। ‘छलफल प्रस्ताव प्रस्तुत मात्रै गर्दा हामीलाई केही आपत्ति छैन, नियमापत्ति छैन,’ उनले भने।

तर छलफलको जवाफ दिने क्रममा समेत प्रधानमन्त्री संसद्मा उपस्थित नभए नेपाली कांग्रेसले बहिष्कार गर्ने चेतावनी उनले दिए।

उनले नीति तथा कार्यक्रमलाई एक वर्षका लागि देशको कार्यदिशा र महत्त्वपूर्ण योजना भएको उल्लेख गर्दै त्यसप्रति प्रधानमन्त्री जिम्मेवार हुनुपर्ने धारणा राखे।

केसीले राष्ट्रपति रामचन्द्र पौडेल ले नीति तथा कार्यक्रम प्रस्तुत गरिरहेकै बेला प्रधानमन्त्री शाह संसद्बाट बाहिरिएको घटनालाई पनि अस्वाभाविक र अनुचित भएको बताए।

‘नीति तथा कार्यक्रममाथिको छलफल प्रस्तावमा पनि नआउने, जवाफ दिन पनि नआउने कुरा स्वीकार्य हुन सक्दैन,’ उनले भने, ‘कुनै पनि प्रस्ताव प्रस्तुत गर्दा प्रधानमन्त्री नहुँदा मन्त्रीले गर्ने कुरा स्वीकार्छौँ, तर जवाफ दिन पनि प्रधानमन्त्री नआए त्यसलाई गम्भीर रूपमा लिनुपर्छ।’