काठमाडौं- जनता समाजवादी पार्टी नेपालले आफ्नो चुनावी घोषणापत्रमा नेपाली कांग्रेस, नेकपा (एमाले) र नेकपाको कडा आलोचना गरेको छ।

जसपा नेपालका अध्यक्ष उपेन्द्र यादवले शुक्रबार सार्वजनिक गरेको आगामी निर्वाचनको घोषणापत्रको सुरूवातमै मुख्यतया कांग्रेस, एमाले र माओवादीको तिखो आलोचना गरिएको हो ।

जसपाले तीन ठूला दलहरूलाई परिवर्तनको एजेन्डाबाट टाढिएको, सत्ताको लागि मात्र सक्रिय भएको र संविधानलाई अपूर्ण बनाएको आरोप लगाएको छ। तर जसपाले आफूलाई विकल्पका रुपमा अगाडि सारेकै राष्ट्रिय स्वतन्त्र पार्टीबारे कुनै टिप्पणी गरेको छैन ।

‘नेपालको राजनीतिक इतिहासमा भएका संघर्षहरू (सशस्त्र विद्रोह, जनआन्दोलन, मधेश जनविद्रोह आदि) को परिणामस्वरूप संघीय लोकतान्त्रिक गणतन्त्र स्थापना भए पनि संविधानमा त्रुटि रहेको छ’, घोषणा पत्रमा भनिएको छ, ‘यसलाई पूर्ण बनाउन प्रमुख दलहरूले कुनै पहल गरेको देखिएन।’

कांग्रेस, एमाले र नेकपा (माओवादी केन्द्र) ले बहुमतको दम्भमा संविधान जारी गरेको आरोप जसपाले लगाएको छ । ‘पहिचान र सामर्थ्यमा आधारित राज्य पुनर्संरचना गर्ने आफ्नै प्रतिबद्धताविपरीत उनीहरूले काम गरेका छन्’, अगाडि भनिएको छ, ‘यी दलहरूले संविधानसभाको निर्वाचनमा जनतासँग गरेको वाचा उल्ट्याएका छन् ।’

परम्परागत राजनीतिक शक्तिहरू (यी दलहरू) आफ्नै एजेन्डामा टिक्न नसकेर परिवर्तनका एजेन्डाबाट टाढिँदै गएको पनि जसपाको ठहर छ । ‘सत्ता प्राप्ति, शक्ति आर्जन, स्रोत–साधनमाथि आधिपत्य जमाउने र राजनीतिक अस्थिरता निम्त्याउने चरित्र उनीहरूमा छ’, जसपाले भनेको छ, ‘साम्यवादी लक्ष्य बोकेका कम्युनिस्ट घटकहरू र नवउदारवादी पूँजीवादी व्यवस्थाको रक्षा गर्ने कांग्रेसको राजनीतिक चरित्र सत्ता प्राप्तिमै सीमित भएको छ।’

यी दलहरूले आफैंले गरेका सहमति, समझदारी र सम्झौताप्रति प्रतिबद्धता नदेखाएको, अपूर्ण संविधानलाई पूर्ण र सर्वस्वीकार्य बनाउने दिशामा कुनै प्रयास नगरेको आरोप पनि जसपाले लगाएको छ।

यहीकारण जसपा नेपालको बनेको जनाउँदै घोषणा पत्रमा यसले नेपाली समाजको बहुलता, विभेदमुक्ति, राष्ट्रिय/जातीय पहिचानसहितको संघीयता, समाजवादी अर्थ–राजनीतिक दिशा, समावेशी लोकतन्त्र र सुशासनलाई जोड दिने दाबी गरिएको छ । यो घोषणापत्रमा तीन ठूला दलहरूको आलोचना गरेरै आफ्नो वैधता र आवश्यकता स्थापित गर्न खोजेको छ ।