एडिस अबाबा – यमनमा इरान–समर्थित हुथी लडाकु र साउदी–समर्थित सरकारबीचको लडाइँ बढेपछि यस साता दुई हजारभन्दा मानिस जिबुटी आइपुगेका संयुक्त राष्ट्रसङ्घले आइतबार जनाएको छ ।

एक हप्ता लामो हुथी आक्रमणले यमनको ‘रेड सी’ को बाँकी तट र केही रणनीतिक टापु कब्जा गरेर रणनीतिक बाब अल–मन्दाब जलमार्गमा आफ्नो पकड बलियो बनाउँदै गर्दा यहाँबाट दशौँ हजार मानिस भागेका छन् ।

बिहीबार समूहले ‘रेड सी’को बन्दरगाह शहर मोचा कब्जा गर्‍ यो, जुन युरोपबाट एसिया जाने जहाजका लागि महत्त्वपूर्ण जलमार्गमा पर्छ ।

“यमनको द्वन्द्वबाट भागेर दुई हजारभन्दा बढी मानिस जिबुटीको तटमा आइपुगेका छन्,” अन्तर्राष्ट्रिय आप्रवासन सङ्गठनले आइतबार सामाजिक सञ्जाल एक्समा लेखेको छ ।

संयुक्त राष्ट्रसङ्घीय निकायले एएफपीलाई पहिलो समूह बिहीबार साँझ आइपुगेको बताएको छ । साना अफ्रिकी देशका अर्थ र वित्त मन्त्री इलियास मौसा दावालेहले शनिबार करिब एक हजार ४०० जनाको आँकडा दिएका थिए ।

जिबुटी बाब अल–मन्दाब जलमार्ग र यमनको पारिपट्टी छ, जुन मध्यपूर्वी युद्ध सुरु भएपछि इरानले होर्मुज जलसन्धिमा नाकाबन्दी सुरु गरेपछि साउदी अरबको तेल निर्यातका लागि महत्त्वपूर्ण धमनी बनेको छ ।

करिब दस लाख जनसङ्ख्या भएको अफ्रिकाको सबैभन्दा कम जनसङ्ख्या भएका देशहरूमध्ये एक जिबुटी तेल–धनी खाडी राज्यहरू पुग्ने आशामा महाद्वीप छाड्ने प्रवासीहरूका लागि मनपर्ने ट्रान्जिट बिन्दु हो ।

संयुक्त राष्ट्रसङ्घका अनुसार जुलाईदेखि लडाइँका कारण यमनमा कम्तीमा ७६ हजार मानिस विस्थापित भएका छन्, र हुथी आक्रमणका कारण पछिल्लो एक हप्तामा यो सङ्ख्या चार गुणा बढेको छ ।

करिब २३ हजार वर्ग किलोमिटर क्षेत्रफल भएको जिबुटीमा बाब अल–मन्दाब जलसन्धि हेर्ने अमेरिका, चीन, जापान, फ्रान्स र इटालीका सैन्य आधार छन् ।