विराटनगर- कोशी प्रदेशसभाको नवौँ अधिवेशनको २३औँ बैठक आगामी भदौ ३ गते दिउँसो १ बजे बस्ने भएको छ।

कोशी प्रदेशसभा सचिवालयका सचिव सुदर्शन खड्काले जारी गरेको सूचनाअनुसार बैठक कोशी प्रदेशसभा परिसर, कटहरीमा बस्नेछ। यसअघि गत असार २४ गते अर्को सूचना जारी नभएसम्मका लागि प्रदेशसभाको बैठक स्थगित गरिएको थियो।

प्रदेशसभा नियमावली, २०७४ को नियम ६ बमोजिम प्रदेशसभा सदस्यहरूको जानकारीका लागि सभामुख अम्बरबहादुर विष्टले बैठक आह्वानसम्बन्धी सूचना प्रकाशित गरेको सचिव खड्काले जानकारी दिए।

नवौँ अधिवेशनको पहिलो बैठकदेखि २२औँ बैठकसम्म विराटनगरस्थित वीरेन्द्र सभागृहमा सञ्चालन हुँदै आएको थियो। त्यसअघि भने प्रदेशसभा बैठक जिल्ला समन्वय समितिको परिसरभित्र निर्माण गरिएको भवनबाट सञ्चालन हुँदै आएको थियो।

आगामी बैठक भने कटहरीस्थित कोशी प्रदेशसभा परिसरमा सञ्चालन हुने भएको हो।