काठमाडौं- सर्वोच्च अदालतको पूर्ण इजलासले पूर्व बालसैनिकसम्बन्धी रिट निवेदनमा परमादेश जारी गरेको छ।

लेनिन विष्टसहितले दायर गरेको रिटमा तत्कालीन प्रधानमन्त्री तथा पुष्पकमल दाहाल प्रचण्ड र डा. बाबुराम भट्टराईसमेतलाई विपक्षी बनाइएको थियो। उक्त मुद्दामा सर्वोच्चले शुक्रबार रिट निवेदकको माग बमोजिम परमादेश जारी गरेको हो।

यससँगै बालसैन्य भर्ना गरेको कसुर विष्टले दर्ता गएको रिटमा आएको फैसलाबाट अब प्रचण्ड र बाबुरामलाई कानुनी कारबावाहीको बाटो पनि खुलेको छ।

फैसलापछि लेनिन विष्टले सामाजिक सञ्जालमार्फत प्रतिक्रिया दिँदै पूर्व बालसैनिकहरूको न्याय र एकताका लागि सहयोग गर्ने सबैप्रति आभार व्यक्त गरेका छन्।

उनले लेखेका छन्, ‘पूर्व बालसैनिकको न्याय र एकताबद्धताका लागि सहयोग गर्ने सबैलाई बधाई। आज हामीले एउटा ठूलो लडाइँ जितेका छौं। आज सर्वोच्च अदालतको पूर्ण इजलासले परमादेश जारी गरेको छ। फेरि पनि सबैलाई धन्यवाद, बधाई छ।’

सर्वोच्च अदालतको पूर्ण फैसलाको विस्तृत पाठ भने सार्वजनिक हुन बाँकी रहेको छ। त्यसपछि परमादेशको दायरा र कार्यान्वयनसम्बन्धी थप विवरण स्पष्ट हुने आशा छ ।