काठमाडौं – स्वास्थ्य, जनसंख्या तथा खानेपानीमन्त्री निशा मेहताको सम्पत्ति विवरण सार्वजनिक भएको छ। आइतबार सार्वजनिक गरिएको विवरणमा उनको नाममा सुनचाँदी, जग्गा, बैंक मौज्दात, सेयर तथा सवारी साधनसमेत रहेको देखिएको छ।

विवरण अनुसार मन्त्री मेहतासँग ३० तोला सुन र ५० तोला चाँदी रहेको उल्लेख गरिएको छ। उक्त सुनचाँदीको स्रोत दाइजो, उपहार तथा आंशिक रूपमा स्वआर्जनबाट प्राप्त भएको उनले खुलाएकी छन्।

अचल सम्पत्तितर्फ काठमाडौँको सौखेलमा ७ आना जग्गा रहेको विवरणमा उल्लेख छ। सो जग्गाको स्रोत श्रीमानको आम्दानी, आफ्नो तलब तथा ऋण रहेको जनाइएको छ।

बैंक मौज्दाततर्फ माछापुच्छ्रे बैंकमा ७ लाख २३ हजार ५३५ रुपैयाँ र सानिमा बैंकमा १० लाख रुपैयाँ गरी करिब १७ लाख रुपैयाँभन्दा बढी रकम रहेको उल्लेख गरिएको छ।