काठमाडौं – शिक्षा, विज्ञान तथा प्रविधि मन्त्री सस्मित पोखरेलको कुल सम्पत्ति २४ करोड १६ लाख रुपैयाँ बराबर रहेको खुलेको छ ।

प्रधानमन्त्री तथा मन्त्रिपरिषद् कार्यालयले आइतबार सार्वजनिक गरेको विवरणअनुसार अचल सम्पत्तितर्फ, मन्त्री पोखरेलको नाममा काठमाडौँमा तीन आना क्षेत्रफलमा बनेको अढाई तले घर रहेको छ, जसको मूल्य ४ करोड रुपैयाँ तोकिएको छ।

त्यस्तै, काठमाडौँकै मूलपानीमा ६ आना जग्गा (५ करोड रुपैयाँ) र मोरङमा १ कठ्ठा जग्गा (१ करोड रुपैयाँ) रहेको उल्लेख छ। पारिवारिक सम्पत्तिमा पनि उल्लेख्य हिस्सा देखिन्छ।

उनका बुवाको नाममा काठमाडौँमा ४ आना २ पैसाको घडेरी (करिब साढे २ करोड रुपैयाँ) रहेको छ भने आमा मिनाक्षी पोखरेलको नाममा गोदावरी र गोकर्णेश्वरमा गरी करिब ३ करोड रुपैयाँ बराबरको जग्गा छ। यसबाहेक, परिवारकै नाममा गोदावरीमा ११ रोपनी ४ आना जग्गा रहेको छ, जसको मूल्य ५ करोड रुपैयाँ उल्लेख गरिएको छ।

चल सम्पत्तितर्फ, मन्त्री पोखरेलसँग २५ तोला सुन र १०० तोला चाँदी रहेको छ । बैंक मौज्दाततर्फ, सानिमा बैंकमा २ लाख ४८ हजार रुपैयाँ र एनआईसी एसिया बैंकमा २ लाख रुपैयाँ गरी कुल ४ लाख ४८ हजार रुपैयाँ रहेको छ। त्यस्तै, विभिन्न कम्पनीका सेयरमा परिवारको नाममा १ करोड ७७ लाख रुपैयाँ लगानी रहेको विवरणमा उल्लेख छ।

सवारी साधनतर्फ, बुवाको नाममा करिब ७० लाख रुपैयाँ पर्ने एक ईभी कार रहेको छ भने मन्त्री पोखरेलको नाममा झन्डै ४० लाख रुपैयाँ बराबरको अर्को कार रहेको छ। यद्यपि, उनले ७५ लाख रुपैयाँ ऋण रहेको पनि खुलाएका छन्।