काठमाडौं । महिला, बालबालिका तथा ज्येष्ठ नागरिक मन्त्री सीता वादीसँग नगद तथा बैंक मौज्दातदेखि लिएर घरपालुवा जनावरसम्म रहेको विवरण सार्वजनिक भएको छ । आइतबार सार्वजनिक गरिएको विवरण अनुसार मन्त्री वादीसँग २० वटा कुखुरा र एउटा कुकुर रहेको छ।

यस्तै, उनको नाममा एउटा स्कुटर, तीन वटा ल्याप्टप र दुई वटा मोबाइल फोन रहेको उल्लेख गरिएको छ। उनका श्रीमानसँग भने पल्सर मोटरसाइकल रहेको विवरणमा जनाइएको छ।

आर्थिक पक्षतर्फ, मन्त्री वादीसँग नगद ५० हजार रुपैयाँ रहेको छ भने बैंकमा उनी र उनका श्रीमान्‍को नाममा जम्मा १५ लाख रुपैयाँ मौज्दात रहेको उल्लेख गरिएको छ।

त्यसैगरी, मन्त्री वादीसँग १८ तोला सुन र १५ तोला चाँदी रहेको छ, जुन विवाहको अवसरमा प्राप्त भएको सम्पत्ति भएको विवरणमा जनाइएको छ। अचल सम्पत्तितर्फ, मन्त्री वादीको नाममा सुर्खेतमा ८९.६५ वर्ग मिटर क्षेत्रफलमा फैलिएको जग्गा रहेको उल्लेख गरिएको छ।