काठमाडौँ – नवलपरासी (बर्दाघाट सुस्ता पूर्व) को गैंडाकोट नगरपालिका–१२ हर्कपुरस्थित पूर्व–पश्चिम राजमार्गमा शनिबार बिहान दुई वटा बस एकआपसमा ठोक्किँदा १८ जना घाइते भएका छन्।

नारायणगढबाट बुटवलतर्फ जाँदै गरेको लु २ ख ६४५७ नम्बरको बसलाई सोही दिशातर्फ जाँदै गरेको लु २ ख ६०३६ नम्बरको बसले पछाडिबाट ठक्कर दिँदा दुर्घटना भएको हो। बिहान करिब ६:५० बजे भएको दुर्घटनामा दुवै बसमा सवार १८ जना घाइते भएका हुन्।

घाइतेहरूलाई उपचारका लागि भरतपुरस्थित चितवन मेडिकल कलेज र पुरानो मेडिकल कलेज पठाइएको प्रहरीले जनाएको छ। पुरानो मेडिकल कलेजमा कालिकोटका धनमान हमाल, गैंडाकोटका लिला थापा, प्रेम बहादुर रानाभाट, मिरा आचार्य, बाराका मोहन भैया साह, चितवनकी निशा तिवारी, उनका ८ वर्षीय छोरा ऐट्रेन भट्ट, दाङका निमलाल खड्का, अमृता खड्का तथा रुपन्देहीका मनोज गुरुङ र हुमा गुरुङको उपचार भइरहेको छ।

यसैगरी नयाँ चितवन मेडिकल कलेजमा बस चालक सन्तोष बहादुर गुरुङ, गैंडाकोटका आत्रिया पौडेल, माधवा ज्ञवाली, सिता ज्ञवाली, जस्विन ज्ञवाली, गोरखाका शंकर बयलकोटी र चितवनकी दिभा रानाभाटको उपचार भइरहेको छ।

दुर्घटनाबारे थप अनुसन्धान भइरहेको प्रहरीले जनाएको छ।