काठमाडौँ – बाजुराको प्रसिद्ध धार्मिक तथा पर्यटकीयस्थल बडीमालिका क्षेत्रमा टेलिफोन तथा इन्टरनेट सेवा विस्तारका लागि नेपाल टेलिकमले नेपाली सेनाको हेलिकप्टरमार्फत सञ्चार उपकरण ढुवानी गरेको छ । भौगोलिक विकटता र सडक सञ्जालको अभावका कारण स्थलमार्गबाट सामान पुर्‍याउन असम्भव भएपछि मङ्गलवार सेनाको हेलिकप्टर प्रयोग गरिएको हो ।

सञ्चारमन्त्री डा. विक्रम तिमिल्सिनाले साउन ८ गते बडीमालिकामा तत्काल दूरसञ्चार सेवा पुर्‍याउन टेलिकमलाई निर्देशन दिएका थिए । मन्त्रीको निर्देशनपछि नेपाल टेलिकमले बडीमालिका र त्रिवेणी नगरपालिकाका प्रमुखसँग समन्वय गरी पूर्वाधार निर्माण र उपकरण ढुवानीको काम अघि बढाएको हो ।

नेपाल टेलिकम सुदूरपश्चिम प्रादेशिक निर्देशनालयका निर्देशक बृजेश शर्माका अनुसार साउन १८ गतेदेखि नै उपकरण पुर्‍याउने प्रयास गरिए पनि प्रतिकूल मौसमका कारण ढिलाइ भएको थियो । मङ्गलवार हेलिकप्टरबाट तोकिएको स्थानसम्म सामान पुर्‍याइए पनि त्यहाँबाट जडानस्थलसम्म करिब चार हजार किलोग्राम सामग्री स्थानीय जनशक्तिमार्फत बोकाएर लैजानुपर्ने चुनौतीपूर्ण अवस्था छ ।

समुद्री सतहबाट करिब ४ हजार २ सय मिटरको उचाइमा रहेको बडीमालिकामा सञ्चार सेवा नहुँदा स्थानीयका साथै तीर्थयात्री र पर्यटकले ठूलो सास्ती खेप्दै आएका थिए । टेलिकमले बडीमालिकामा प्रारम्भिक चरणमा ४जी सेवा सञ्चालन गर्ने तयारी गरेको छ । जडानस्थलमा सामग्री पुगेपछि आगामी पाँच दिनभित्र साइट सञ्चालनमा आउने टेलिकमको अनुमान छ ।

टेलिकमले यसअघि नै डोल्पाको ल्हान र ताप्लेजुङको ओलाङचुङगोला मा फोरजी सेवा विस्तार गरिसकेको छ भने सगरमाथा आधार शिविर क्षेत्रमा पनि फोरजी विस्तारको अध्ययन भइरहेको जनाएको छ ।